Komu kennararnir aldrei á söngsal?

Ég sá það á síðu 40 ára stúdenta að undirbúningsnefnd þeirra heldur að þeirra frómi árgangur sé sá eini sem kunni „Burtu með sút“.

Ég er bara alls ekki sammála og vil halda uppi vörnum fyrir minn frábæra árgang. Þegar við vorum í MA var „Burtu með sút“ sungið a.m.k. einu sinni á hverjum söngsal, því það var svo gaman að hoppa þannig að gólfið á sal dúaði verulega.   Ég sá að einhverjir af okkar ekki svo gömlu kennurum eru í undirbúningsnefnd 40 ára stúdenta. Það segir mér að kaffið á kennarastofunni hafi bragðast vel þegar við vorum á söngsal og enginn þeirra lagt leið sína á Sal. Það segir mér líka að hoppin okkar voru ekki jafn áhrifamikil og ég hélt. Mér fannst allur skólinn skjálfa en líklega hefur sá skjálfti ekki borist á kennarastofuna. 

 

Textinn við „Burtu með sút“ birtist að sjálfsögðu í þeirri frábæru bók Söngbók MA sem kom út í apríllok 1983. Sú góða bók var mikið notuð á vordögum 1983 og hefur fólk sést með hana upp á vasann við ýmis tækifæri síðan. Er ekki tilvalið að pakka henni niður fyrir næstu helgi?

Ef einhver skyldi hafa týnt bókinni þá er textinn a.m.k. hér eins og hann birtist í þessari góðu söngbók.

 

Burtu með sút,

bróðir drekk út,

svo búi með oss gleði.

Tak þennan kút

og kneifaðu´  af stút,

kátt verður þér í geði.

Hlýnar þér þá

frá haus oní tá,

og hoppa þig fer að langa.

Súptu því á,

meðan sopa´ er að fá.

Svona á lífið að ganga.

 

Rósína mín dýra

í dansinn viltu stíga

við kónginn í Krít.

Ég er ekki fríður

en feikilega blíður.

Á nóttunni engu síður,

en aðrir vil ég mitt.

Í myrkri eru allir kettir eins á lit.

Á lit.

 

Aðalniðurstaðan er þó sú, að við kunnum „Burtu með sút“ og getum sko enn hoppað!!! Mig er farið að langa verulega til að hoppa með ykkur. 

Mikið hlakka ég til.

ÁJ

Athugasemdir

[Inga Dagný Eydal, 7.6.2008 kl. 16:58]

Jú við kunnum þetta svo sannarlega það er ábyggilegt en kannski ekki seinni tíma árgangar. Kannski er bara ágætis hugmynd að hafa sýnikennslu í þessu ágæta lagi. Hins vegar er þetta í söngskránni í höllinni það er alveg öruggt

[Sverrir Páll Erlendsson, 10.6.2008 kl. 09:42]

Gott að á þetta er minnst. Þetta hefur að vísu eitthvað skolast til einhvers staðar, en við töldum að Burtu með sút væri meðal þeirra laga sem væru NÚ orðin úrelt og óþekkt þeim sem ERU í skólanum, en Það var í Vaglaskóg kynnu hins vegar trúlega fáir aðrir en við. Auðvitað sunguð ÞIÐ þetta og rifuð raddböndi í AÁ LIIIIIIIIIIIIIT!

Kennararnir fóru stöku sinnum á söngsal þótt kaffið væri gott, en það hafa samt ekki nema eitthvað 10-15 manns af okkur 122 kennt við MA :)

Gleðilega hátíð! 

[Ásta Júlía Hreinsdóttir, 10.6.2008 kl. 17:15]

Gleðilega hátíð, smömuleiðis, Sverrir Páll!

Mér finnst nú algert met að 10 - 15 manns úr sama útskrifatarárgangi hafi kennt við sama skólann!!!  Ætli það sé einsdæmi?

Ef staðreyndin er sú að Burtu með sút er úrelt lag þá vita núverandi nemendur bara alls ekki af hverju þeir eru að missa. Þarf ekki bara að kenna þeim þetta? 

[Sverrir Páll Erlendsson, 12.6.2008 kl. 00:47]

Það er ótrúlega erfitt að kenna ungum hundi að sitja ef honum finnst það ekki töff.