25 ára MA stúdentar 2008

Sæl öll!!!

Nú er ég búin að setja mínar myndir inn á vefinn okkar. Það eru komnar myndir frá öllum dögum hátíðahalda okkar, úr höllinni og allt. Því miður á ég ekki myndir af öllum 25 ára stúdentum sem tóku þátt í hátíðarhöldunum, svo það væri gott ef einhverjir aðrir gætu bætt úr því.

Það væri alveg frábært að fá fleiri myndir og ég treysti því að þær komi. Ég bíð alveg spennt eftir því að sjá myndir úr bekkjarpartýum hinna bekkjanna. Það er ekkert vit að hafa bara myndir úr F-partýinu. Það væri mjög gaman að hafa myndir frá öllum bekkjum, ekki satt???

Sjá upplýsingar um innsetningu í fyrri skrifum.

Hafið það gott í sumarblíðunni

Ásta Júlía

Komið öll sæl

og hjartans þakkir fyrir dásamlegan tíma

Ég var að koma heim og í nettengingu og þakkir til ykkar allra var það fyrsta sem mér kom í hug. Ég get ekki ímyndað mér að gleðivíman renni af mér næstu mánuði. Þetta var stórkostlegt frá upphafi til enda.

Undirbúningsnefndir, bæði sunnan og norðan heiða.

Óvissuferðin var frábær og allt í höllinni tókust framar björtustu vonum. Við getum öll verið stolt af „okkar“ framlagi þar.

Inga Dagný. Undirbúningur þinn skilaði sér svo sannarlega. Kynningarnar á árgöngum voru glæsilegar og allt utanumhald var með sóma.

Friðfinnur og Inga þið voruð glæsilegir kynnar!!

Steinunn.

Ræðan þín var smellin, skemmtileg og átti erindi til allra og flutt af þeim skörungsskap sem við er að búast af þér. Takk kærlega fyrir

Þorlákur

Ræðan þín á 17. júní var líka mjög flott og viðeigandi. Takk fyrir, þú varst glæsilegur fulltrúi 25 ára stúdenta.

Öll hin.

Takk fyrir að vera hlutarnir sem fylla heildina sem þessi frábæri árgangur myndar. Það eru allir einstaklingarnir stjörnur á þeim himni. Þið eruð æðisleg!!! Ég held að það geti enginn sem ekki hefur reynt það ímyndað sér hvernig er að vera hluti af svona hópi.

Það er svolítill tregi í mér yfir því að þetta er allt búið en ég mun svo sannarlega lifa á minningunum um ókomin ár. Ég mun örugglega skoða myndirnar oft. Ég set eitthvað af þeim inn á netið á næstu dögum. Nú hef ég líka enn meiri ástæðu til þess að hlakka til að hitta ykkur næst.

Talandi um það.

Það kom upp hugmynd um að hafa einhverskonar hitting fyrir þá sem kæmust hér í Reykjavík í haust, eitt skemmtilegt kvöld t.d. fyrstu helgina í september. Nánar um það síðar.

Bestu kveðjur til ykkar allra og líka þeirra maka sem mættu, gaman að kynnast þeim.

Þar til næst,

Ásta Júlía

Fyrir sléttum 25 árum síðan vorum við með nefið í bókunum að lesa fyrir síðasta prófið í MA. Það hafa sjálfsagt blundað misjafnar tilfinningar með okkur á þeim tímamótum og eflaust höfum við átt misjafnlega auðvelt með að festa okkur við skræðurnar þennan síðasta dag.

Kannski hafa blendnar tilfinningar verið byrjaðar að láta á sér kræla strax þarna en þær komu örugglega hjá flestum okkar nokkrum dögum síðar, þegar við kvöddumst eftir fjögurra ára samveru.

EN

Hugsið ykkur bara hvað við erum ótrúlega heppin að hafa haft tækifæri til þess a hittast reglulega á þessum 25 árum og enn heppnari að það er einmitt að koma að slíku tækifæri eftir tvo daga. Mikið verður það nú gaman!!!!

Við getum auðvitað byrjað hvert fyrir sig á hátíðarhöldunum í dag og haldið upp á að það eru 25 ár frá síðasta próflestrardeginum. Svo getum við haldið upp á það á morgun að þá eru 25 ár frá síðasta prófdegi og svo fram eftir götunum.

Hlakka til að sjá ykkur

Ásta Júlía

Dagskrá 25 ára stúdenta 14. – 16. júní 2008 

Laugardagur 14. júní
Bekkjapartý úti um allan bæ og sveitir! Þeir sem vilja geta svo kíkt á Græna hattinn eftir kl. 24. Það er mikil AIM tónlistarveisla í gangi í bænum þessa daga og það verða tónleikar á Græna kl. 22:30. Þegar tónleikum lýkur, upp úr miðnætti erum við velkomin og það kostar ekkert inn. Haukur “vertinn” á staðnum býst við okkur. Hann er búinn að undirbúa sig og finna tónlistina okkar.

Sunnudagur 15. júní -  óvissuferð

Mæting við Gamla skóla kl. 13:45 áætluð heimkoma um kl. 24:30. Ath. það kostar 6000 í ferðina. Þeir sem ekki hafa greitt eru beðnir um að gera það hið fyrsta. Í ferðinni verður boðið upp á létta hressingu um kaffileytið (hugsanlega líka snafs þegar líður á daginn) og svo verður að sjálfsögðu boðið upp á kvöldverð. Þeir sem vilja geta tekið með sér malpoka. Þið eruð orðin nógu gömul til þess að vita að best er að klæða sig samkvæmt óútreiknanlegu íslensku veðri. (Minni á að við dimmiteruðum í snjókomu og útskrifuðumst í rigningu – það var a.m.k. blautt um morguninn en svo kom sólin).
Þema ferðarinnar er íslenskt, gamalt og gott. Lopapeysa og góðir skór er klæðnaður sem aldrei klikkar. Gott ef þið getið hreyft ykkur frjálslega í fötunum og bæði gengið rösklega og dansað í skónum. Munið að bekkirnir eiga að sjá um skemmtiatriði á kvöldverðarstað. Upplagt að æfa þau í bekkjarteitunum. Í óvissuferðinni verður líka einhvers konar keppni milli bekkja svo þeir sem vilja geta skipulagt búningamál/sérkenni ef áhugi er á því.

Hátíðardagskrá í Höllinni sem hefst með fordrykk kl. 18. Við mætum náttúrulega öll með okkar gömlu góðu stúdentshúfur og dönsum fram á nótt. Förum svo að sjálfsögðu síðust heim eins og góðum gestgjöfum sæmir.

Fyrir hönd nefndarinnar fyrir norðan,

Fríða P.